كيك يجنن

صباح الخير على كل بناتى الحلوين
قلت قولكم على طريقة كيك
نغير شوية مش كله دراسة احنا برضه ناس جامدة وستات زى الفل ولا ايه
المقادير:
2كوب دقيق+1ملعقة صغيرة بيكنج بودر
1كوب سكر
2/3 كوب سمن
4بيضة+1/2 ملعقة صغيرة فانيليا
بشر برتقالة +1/2 كوب عصير برتقال أو 1/2 كوب لبن+كاكاو
الطريقة:
يضرب البيض والسكر والسمن جميعا فى الخلاط او المضرب الكهربائى لمدة 1/4 ساعة
يضاف الخليط السابق على الدقيق والبيكنج بودر ويقلب بالملعقة فى حالةاستخدام الخلاط أو يضاف الدقيق وتخفق جيدا فى حالة استخدام المضرب الكهربائى
يضاف بشر البرتقال والعصير ويمكن اضافة جوز هند وزبيب او اقتراح اخريضاف لبن وتقسم العجين الى نصفين نصف يخلط بالكاكاو ونصف ابيض وتصب بالتبادل فى قالب مدهون
بالهنا والشفا
لما تعملوا الكيك بقوا قلولى علشان بعد كده نقول ازاى نستفيد منها فى العمل مع الاطفال ونقدم مفاهيم علمية ورياضية ولغوية وغيره يلا بقى مين بدا

السلام عليكم
شكرا يا دكتور علي المجهود الرائع
بس برده دي حجة زكية ان الاول نتعلم الكيك وبعد كده ازاي نستفيد منه بعد كده مع الاطفال
بس بجد تسلم ايديكي

واااااااااااو

انا بموووووووت فى الكيكه اللى بالكاكاو او الشيكولاته

والكيكه اللى بنحط عليها زبيب .. بيبقى طعمها يجنن

على كدا مش هندى الاطفال حاجه هناكلها احنا

شكرا ليكى يا دكتور

يسلمووووووو ايديكي يا احلى دكتورة

وانا انشالله بسويها بس بحطلها الكاكاو لانه انا بموووووووووووت عالكيكة اللي بالشيكولاتة

متشكرة جدا يا دكتورة
انا جربتها والكيك طلع حكاية
بنتك نور

والله يا دكتورة طريقة الكيكة دى تجنن واستفادنا منها كتير وانتى والله يا دكتورة زى العسل
وربنا يخليكى لينا وكل اللى حضرتك عاملة ع المنتدى فعلا يفيدنا كتير شكرا يا دكتورة

اذيك يا دكتورة انا عجزه عن الشكر للاهتمام بنا واوعدك اني هعمل الكعكه وهقول رايئ بصراحه وبدون زعل بس انا متاكده انها هتطلع زي العسسسسسسسسسل بنتك نورا

شكرا يادكتورا مش ناسيانا فى كل حاجه بجد انت ام تانيه لينا فى البيت ةالكليه بجد مش عارفين نشكرك ازاى يارب يخليكى لينا

والله عسل يادكتوره جزاكم الله خيرا
اخر مره عملت فيها الكيكه وشها اتحرق شيلنا الوش واكلنا اللي في الوسط
هاتقولو خايبه لكن والله الفرن علي عليها مع اني كنت مهدياه ماتسألوش ازاي
يمكن عشان عرفت انه هايطلع لحمايا منها زعلت الله اعلم
جزاكم الله خيرا
لك كل الحب والتقدير

انا طول عمرى متعوده عالجاهز حتى لما بدأت اعمل انا بقيت اجيب البودره الجاهزه اعملها كيكه
ولحد دلوقتى مبعرفش اعمل بمقادير
لكن مدام حضرتك الى مدياهالدنا مقدرش معملهاش بنفسى وربنا يستر على اهل الدار
جزاكى الله خير يادكتوره