عايزة تتجوزى ؟ :)

السلام عليكم ورحمة الله ,
أخواتى الأعزاء أكيد بعد ما الواحدة فينا بتتخرج بتبتدى تنتبه اكتر لموضوع حياتها العائلية و مستقبلها الأسرى و ازاى مثلا ممكن تتجوز و تكون أسرة ملتزمة و سعيدة و السؤال الأهم من ده كله هو ازاى هتلاقى شريك حياتها ده ؟!

مشكلتنا دايما ان العرسان اللى بيجولنا مش احنا اللى بنختارهم ! يعنى بما أن كليتنا مش مختلطه و لله الحمد فالسبيل الوحيد عشان البنت فينا تلاقى شريك حياتها ان حد من أسرتها مثلا يرشحها لواحد يكون معرفة ولا حاجه و بعدين يروح يشوفها و بعدين تكتشف انه مينفعش يمكن أفكاره ، درجة التزامه ، عقليته أو يمكن شكله يكون كده و هكذا ممكن البنت تتزار مليون مرة و برضوه متلاقيش الشاب اللى بتحلم بيه

عشان كده انا فكرت فى طريقة جديده و يمكن فيه منكم فى البداية أول ما يسمعوا فكرتى ديه يستغربوا عليها او ميستسيغوهاش بس بجد الفكرة مبتكرة جدا هو صحيح موقع زواج بس بجد مش زى اى موقع انا عمرى ما شوفت موقع بيحافظ على حياء البنت بالشكل ده و مش فاتح الدنيا و يخلى اى بنت تتكلم مع اى شاب ، اطلاقا الموقع فكرته ثورية انتى بتدخلى و تسجلى عليه مجانا و بتعملى لنفسك بروفيل تكتبى كده زى اربع خمس سطور عن نفسك و 4 خمس سطور تانيين عن شريك حياتك اللى بتتمنيه و بعدها ممكن تبدأى تبحثى عن الزوج بالمواصفات اللى انتى عايزها أولا طبعا هتتعرفى على عقليته و اسلوب تفكيره من الكلام اللى كاتبه عن نفسه .. طب هتقوليلى طبعا و ياترى اربع سطور مش كافيين عشان اعرف ازاى الأنسان ده بيفكر هقولك مهو فى اسئلة كتيرة حوالى 700 سؤال ممكن يتسأل لأى شاب انتى تختاريه الأسئلة ديه فى كل المواضيع ده غير ان هو اصلا بيكون مجاوب على اسئلة كتيرة اتسئلتله و محدش يقدر يكذب او يمثل فى كل ردوده أكيد لو هو فعلا مش ملتزم هينكشف المهم دايما ان الموقع ده بيضمنلك ان مفيش حد غلس او مش مناسب ليكى ممكن يتكلم معاكى .. فقط الشخص اللى هتختاريه و تضيفيه لقائمة قبولك هو اللى ممكن يتفتح الكلام معاه بحيث بس تسمحيله انه ياخد رقم تليفون والدك عشان يرتب موضوع الرؤية الشرعية

بجد يا بنات انا فى البداية مكنتش مقتنعة بموضوع المواقع ديه تماما بس لما شوفت الموقع ده و عرفت انه كمان موقع اسلامى و اسلوبه فى قمة الأحترام قررت انى اشترك فيه و ده على فكرة كان بعلم والدى العزيز يعنى انا مكنتش بعمل حاجه غلط عشان اخبيها و لو اى واحده فيكم ليها أى اسئلة انا مستعدة أجاوبها و بكل سرور

اه صحيح انا نسيت اقولكم عنوان الموقع
العنوان هو www.kobool.com

ممكن يكون كلامك مقنع بس مش قوى ممكن الشخص اللى انت هتسئليه ال700 سؤال ايه يضمنلى انه مش يبكدب وانا معاكى فى موضوع انه يجى يقابلك فى البيت وتحصل الرؤيه الشرعيه بس انا من وجهه نظرى انه لازم العريس يجى عن طريق ثقه مش معلهش موقع لا تضمنى فيه الشخص ده اصله ايه حتى لو قابلتيه وتعرفت عليه شخصيا على العموم ربنا يوفقك ويرزق البنات كلها بالازواج الصالحه ويخليلى خطيبى يارب

طيب طيب خلاص متزعلوش  انا مقصدش أزعل حد بس لازم تسألوا نفسكم سؤال مهم جدا ؟!
ايه هو تعريف كلمة موثوق فيه ؟ ده لو قدرتم فعلا تلاقوا تعريف دقيق للكلمة ديه ؟!
و الدليل العملى انه سعات ممكن يجيلى عريس مترشح من حد قريب ليا ممكن خالى او عمى و ممكن يكون مش عمى نفسه اللى يعرفه معرفة وثيقة لا ده ممكن يكون فى وسيط كمان فى النصف هو اللى يعرف عمى و هو اللى عرفه على الشخص ده و فى النهاية بيكون الشخص ده اسمه جاى من طرف عمى و بعد ما نقعد معاه و نشوف بيفكر ازاى ممكن متعجبناش طريقة تفكيره و برضوه ميطلعش شخص مناسب و على العكس ممكن شخص من على الموقع ده يطلع أفضل بكتيير من الناس اللى بيجبها أقاربنا و لما بنسأل عليه بيطلع شخص كويس جدا و أكيد ده بيبان فى الرؤية الشرعية لما بنشوفه و نشوف أسرته .

فى نقطة تانية مهمة جدا يا بنات مينفعش تحكمى على شىء جديد منغير ماتجربيه و لما نقول ان الجواز من على النت دايما مصيره الفشل يبقى لازم نذكر الطريقة اللى تم بيها الجواز من على النت لأن الطريقة نفسها ممكن تكون طريقة غير شرعية على سبيل المثال التعرف من على الشات و الكلام المباشر بدون اى ضوابط و لا رقابة من اى جهة انما لما تشوفوا الموقع ده و تجربوه أكيد هتحسوا بالفرق لأنه و للمرة التانية بقولها موقع ثورى فى عالم مواقع الزواج ..( الناس اللى بقت بتستخدم ايميل جوجل بعد ما سابت ايميل الهوتميل ممكن يفهموا معنى كلمة ثورى أكتر ) زى ما جوجل غير مفهوم الأيميل الموقع ده كمان غير مفهوم مواقع الزواج اللى انا فى الأصل مكنتش بحترمها .

و أخيرا يا جماعة صعب جدا تحكموا على حاجة منغير ما تكونوا جربتوها ؟؟! كل الموضوع ان بدل ما تروحى تكلمى واحده معرفة عشان ترشحلك شاب بالمواصفات اللى انتى عايزها ممكن تستخدمى الموقع ده و بس و بقول فقط الموقع ده لأن باقى مواقع الزواج فاتحة الدنيا على البحرى و أراهن ان مفيش حد فيكم حتى قرر يدخل موقع الزواج ده و يقرأ بالظبط شرح النظرية اللى بيقوم عليها (نظرية عبقرية) .

مشكلتنا يا جماعة اننا ساعات بنخلى وجهة نظرنا الفردية أساس لابد ان يقيس عليه الجميع بس ده مش دايما صح .. لو انتى اتجوزتى عن طريق معارفك ، ممكن يكون غيرك اتجوز عن طريق موقع زى ده و انا بتكلم عن تجربة واحدة صاحبتى ربنا وفقها فعلا و زواجها كلل بالنجاح بفضل الله .. يبقى لو فيه فرصة و لو 50% انى الاقى شريك حياتى على موقع زى ده (موقع يقوم على الأحترام و الخصوصية) يبقى ليه أسيب الفرصة ديه ، و لو جربت ايه اللى هاخسره ؟

انا فعلا هجرب بس على سبيل الفضول مش اكتر وانا من اشد المعارضين لهذه الزيجات
بس انا هجرب واقولك على النتيجة.....نسيت اقولك انى رافضة الجواز فى الوقت الراهن خاااااالص

ياحبيبه قلبي انتي وهيا انت بتدوري علي شريك حياتك ليه نصيبك هايجيلك لغايه عندك وانت مستريحه ليه لانه اتكتبلك في القدر قبل ماتيجي الدنيا دي يعني مهما نلف ونعمل ماهنخدش غير قدرنا يبقي نؤمن بيه ومانستعجلش عليه وبعدين بدل لما تدوري علي حد يكون مناسب ماتدعي ربنا اللي بيده كل شيء ان يرزقك الزوج الصالح دا الدعاء عباده ويستجاب للعبد للانسان طالما ماستعجلش وخلي املك في ربنا كبيييييييييييييييييييييييييييير انه هايرزقك انسان صالح وثقي في الله لان ربنا قال انا عند ظن عبدي بي واحسن حاجه في كليتنا انها بنات بس والله دي نعمه مش حاسين بيها وهو يعني كل اللي بيعرفو بعض قبل مايتزوجو بتكون زواجهم ناجح وكل واحد اكيد مابيظهرش علي طبيعته اكتر غير بعد الزواج لان قبله بنحاول نبين الحلو فينا ونخفي عيوبنا والرسول صلي الله عليه وسلم قال اذا جاءكم من ترضون دينه وخلقه فزوجوه يعني العريس اللي جايلك عن طريق بمعارفك اسألي عليه كويس اوي وان لاقيتي فيه الحاجتين دول صلي صلاة استخاره وتوكلي علي الله
وفي حاجه دلوأت اي شاب جاهز وانسان كويس يقدر يفتح بيت ويشيل المسؤليه مابيستناش جوازالنت يعني البنات كتير وهايروح للي تناسبه
وشكرا ياميره علي موضوعك بس ياريت نفكر في الكلام اللي قولته

انا معاكى يا اسراء فى كل كلمه قولتيها
فعلا عندك حق معلش يا اميره انا مش مقتنعه

بجد يا اميره الفكره عجبانى و حساها جديده انك مش مجرد ان شريك حياتك هو اللى يختارك لا ده انتى كمان اللى تختاريه بنفسك وعلى فكرة واحده صحبتى قالتلى على موقع قبول ده قبل كده وواضح انه فعلا موقع محترم .
وجزاك الله خيرا على انك عايزة تساعدى البنات

بصوا يا جماعة اغلب الناس ضد الفكرة دى و حتى الاهل مش يرضوا بالفكرة دى
[b]

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ لا تعليق كله فى الفاضى بصراحه

وفي حاجه دلوأت اي شاب جاهز وانسان كويس يقدر يفتح بيت ويشيل المسؤليه مابيستناش جوازالنت يعني البنات كتير وهايروح للي تناسبه [/quote]والله هو ده اللى عايزه ااقوله وبعدين يا اميره حسيتك زعلانه من اراء البنات انت طرحت موضوع للمناقشه كل واحده تقول رايها ربنا يوفقك يا اميره لما يحب ويرضى

ايه الهبل ده يا جماعه الى كتبه ربنا حيكون وامنا بالله وبقدره والى تجرب وتنجح تقولى عريسها المصون اشترها على كام اصل ده كده بيع وشرى

واااو ده الموضوع شكله سخن قوى يا جماعة ..... اممممممممممم
طب قولولي فى مصر أيام ما كانت البنات بيلبسوا البرقع كان ممكن حد يتخيل ان هيجى يوم تسوق فيه البنات العربيات ؟!

طب حد كان ممكن يتخيل ساعتها ان البنات هيسوقوا طيارات كمان ؟ ( كنت فى رحلة قادمة من السعودية و الكابتن كان واحده ست مصرية !)

طب حتى اللحظة ديه لسة فى السعودية مانعين سواقة الستات و البنات للعربيات و ان البنت هناك تسوق عربية ده شىء عيب و مش مقبول و هيقابله اعتراض كبير من الأسرة ؟!

أى حاجه فى أولها لازم تلاقى معارضة أحيانا بتكون شرسة .. أيوة بتكلم بجد الأنسان بيخاف من التغيير .. لو فى شركة ما الموظفين خدوا انهم يشتغلوا على برنامج حسابات معين على الكمبيوتر من حوالى 5 سنين مثلا لو جيت تقولهم هنجبلكم برنامج جديد أحدث و حتى أسهل هتلاقيهم بيرفضوا و بشده ! و هيتحججوا بألف حجة و ده فعلا عن تجربة حصلت مع ناس أعرفهم
يبقى نستنتج ان الأنسان بيقاوم التغيير بطبعه و للأسف فيه فكرة سيئة الناس واخداها على النت بصورة عامة غالبا بتيجى عن عدم فهم دقيق لأستخداماته .

يعنى انا حاسه ان لو واحده فيكم بقا كده اتعرفت على بنت تانيه عن طريق النت و راحت قالت لوالدها ممكن يبتدى يشك ان البنت اللى على النت ديه بنت مش كويسه لا سمح الله ولا حاجه و يمكن تكونى اتعرفتى عليها حتى فى موقع الكلية ده ؟
ناس هتقولى لا اصل موقع الكليه ده موثوق في الناس اللى فيه و كلهم من الكلية و تبع جامعة القاهرة !!
و انا هارد و اقول الموقع زى اى موقع و بيسمح لأى حد انه يشترك فيه حتى لو هو من خارج الكلية يبقى ازاى الشخص ده أكيد موثوق فيه ؟؟!!

نفس النظرية على موقع الزواج ده بل بالعكس بيديلك فرصة تكتشف اللى قدامك أكتر و اكتر و من خلال اجاباته بتعرفه اذا كان ذكى ولا غبى بيلعب و يضيع وقت ولا انسان جاد و بعدين بعد ما بتلاقى الشاب اللى انتى عايزاه مش بيتفتح الأتصال على طول لا ده لازم الأول تشحنى فى الموقع بكارت فودافون بقيمة 25 جنيه كوسيلة تخلى اللى بيلعب ينسحب لو لاقى الموضوع فيه فلوس و بعدين انا مصرة ان الموضوع ده لو اتعمل فى وجود رقابة من الأم مثلا انها تكون قاعده جنب البنت و تساعدها فى اختيار شريك حياتها اكيد خبرة و وجود الأم هيمنعوا ان البنت تقع فى حد بيتسلى .. و تانى بكررها انا متأكده ان كل اللى أدى حكم متسرع على الموقع محاولش يجرب يدخل على الموقع و حتى منغير ما تسجلى فيه ممكن تبدأى البحث على طول عشان بس تشوفى أمثلة الشباب الموجودين ..

انا مؤمنه ان الواحد نصيبه هيجيله بإذن الله بس ايه رأيكم لو نسبب الأسباب و ممكن يكون ده الطريق اللى مكتوب لواحده فينا بالفعل فى قدرها عشان تلاقى شريك حياتها ..
مش يمكن القدر هو اللى خلانى أصلا اكتب الموضوع ده عشان واحده تدخل على الموضوع و تقراه و حتى منغير ما تبدى اى تعليق هتروح و تسجل فى الموقع و تكون كده عملت اول خطوة فى سبيل سعادتها ؟ مش يمكن كلامى يكون صحيح ؟

كلام اللى قدامى ممكن يكون خطأ يحتمل الصواب و كلامى ممكن يكون صح يحتمل الخطأ
!it 's just a chance take it or.. leave it

خبر جديد يا جماعة واضح ان الأقبال على موقع الزواج "قبول" كان عالى جدا لدرجة ان الموقع وقع و ديه أول مرة تحصل و لقيت بدل الموقع الرسالة ديه :
-----------------------------------------------------------------------------
Kobool.com is temporary down for maintenance and would be up soon. Please come back shortly

موقع قبول معطل بصورة مؤقتة لإجراء بعض الصيانة عليه. فضلا عاود الزيارة بعد قليل
-----------------------------------------------------------------------------
مما يعنى ان فيه بنات كتتير من كليتنا حاولوا يزورو الموقع و ده خبر أكيد يسعدنى

أنا بعتقد أن المرأة في الوضع دة سلعة بتاع على الملأ ودة انا مارضهوش ليا و لا لأحد من اخاوتي المسلمات

انا ضد ضد ضد المواقع دى بصراحة بحسها اهانة للبنت اللى تدخل تدور على عريس اللى ليها نصيب فيه هو اللى هتخده وهى معززة مكرمة من غير ما هى اللى تروح تدور

السلام عليكم...
اولا يا اميرة شكرا على فكرتك لان فعلا احنا مظلومين بكليتنا ده والله..
بس واله العظيم لو العالم كله حاول يقنعنى ان شباب النت كويسين ما اقتنع مش عدم ثقه هما كويسين اه وفيهم محترمين اوك وانا معاكى وفيهم نااااااااس بتدور على جواز من النت علشاااااان ظروفها واسباب كتير عندهم كده
بس والله ابدا الشخص البتكلمية على النت هيكون مختلف تمام عن شخصيته الحقيقية لية ...
جربى كده يا اميرة وانت بتكلنى حد ع النت بعد ما تقفلى راجعى نفسك هل ده شخصيتك ما اقصدش مثلا عيوب فيكى لكن الطبيعى ان الانسان لما يكون شايف حد وجهها لوجهه غير لما يكون كلام فقط او كتابة الوضع مختلف تماما....
وربنا يوفقك ويوفقنا ويرزقنا بالزوج الصالح والذرية الصالحة...
بس اكيد مش من ع النت