ازاي تكون زوج غلس؟

ازاى تكون زوج غلس ؟

الصبح وانت رايح على شغلك وهى نايمة تعمد اسقاط اى شيئ اواخبط الباب بصوت عالى علشان تصحيها هى كمان 00 اشمعنى انت ؟ولو حاولت ترجع تنام تانى قول لها مادام صحيتى حضري الفطار بقى



اصحى يوم الجمعة بهمة ونشاط وجهز الافطار لزوجتك بس متنساش انك تستخدم15 طبق واكبر كمية من الملاعق والشوك من اللى عندكم فى المطبخ و10 كوبيات لاعداد طبق بيض وسندوتش جبنة ، طبعا يراعى ترك اثار سمنة على الارض مع ترك التلاجة مفتوحة وقشرالبيض فى الحوض.


فى عيد ميلادها زين لها تورتة عيد ميلادها بخمسين شمعة ولو سألتك ليه خمسين رغم ان عندها15 سنة بس ؟ اتحجج بضعف الاضاءة فى البيت وانت بتبص على النجفة اللى عندكم اللى فيها 30لمبة مع ابتسامة صفراء خفيفة

لو عملت ريجيم اجرى على السوبر ماركت ومحلات الحلويات واملى التلاجة شكولاتة وحلويات وجاتوهات يراعى التجول وانت مستمتع بأكل الجاتوة امامها.



ماتنساش رأيك فى طبيخها لو عاملة لحمة قول لها حلو اوووى الفراخ دى ولو طابخه بامية 00 جميلة اوى الملوخية دى حطة عليها اية يا حبيبتى ؟؟ولو عاملة كيكة قلها انا بحب اشرب شاى مع البسكويت الحلو دة.

لو طلبت منك تنشر الهدوم قلها حاضر مع ابتسامة حانية وبعد ما تخلص نشر الهدوم ادخل عليها وقولها انا نازل اجيب الهدوم اللى وقعت منى فى الشارع ولو سألتك هو اية اللى وقع ؟ اذكر لها كل هدومها اللى كانت مغسولة مع فردة شراب من بتوعك علشان متبقاش مقصودة منك.



لو الزوجة قررت مسح الارضيات فى البيت حاول انك تروح وتيجي على المناطق المبلولة متحجج بأنك محتاج تتصل ضرورى بواحد صحبك ومرة عطشان ومرة تانية بتجيب الجرنال ومفيش مانع انك تقول انك حاسس ان التليفون هيرن كمان شوية.



لو كانت مشغولة فى نظافة البيت او مع الاولاد وطلبت منك تغسل كوبايتين الشاى بتوع الصبح الموجودين فى الحوض ارجعلها كمان دقيقة من دخولك المطبخ وانت ماسك كوباية من الاتنين وهى مكسورة واسألها فى براءة ارمى دى فين ؟؟وانت قاعد تتفرج على التلفزيون وهى طالع عينها فى تنظيف البيت وبعد ما تخلص معلش ممكن كوبية مية علشان ضهرى بيوجعنى.


تخيلوا يا بنات لو واحده فيكو في المستقبل جوزها عمل فيها كده ممكن تعمل فيه ايه

اخس عليكى ياوحشة هتزعلينى منك...انتى بتقويهم علينا هما مش مستنيين نصايحك
عموما انا لو جوزى كده اكييييد هاحجز جناح فى العباسية لانى نرفووووووووووووووووووزة

ليه بس كده انت معانا ولا معاهم يعنى ده يبقى اخر صبرنا

على العموم بقى انا اتجوزت خلاص
بس فعلا زوجى مبيعملش معايا كده خالص
هو متعاون جدا ولما بطلب منه يساعدنى فى
شغل البيت بيطنشنى ولا كانه سامع حاجه
بس هوا مينفعش يعمل كده عشان لو هوا كسر كوبايه هوا اللى هيجيب غيرها
ولو وسخ بعد اما مسحت بقوله هات واحده تنضفلك البيت وادفع ياحلو
وطبعا كفايه عليه مصاريف الكليه
يعنى الحمد لله انا مرتاحه من حرق الدم ده ....................

حرام عليكي ابتسمت كتييييييييييييييييييير
لو جوزي كدا هاخلعه
شكرا ليكي علي اول ابتسامه اليوم دا

لالالالالالالا يا بنات انتو مش فهمتواا قصدي
انا بسالكم لو اتجوزتوا واحد وعمل كده ممكن تعملوا ايه؟
انا عن نفسي هروح اعمل سيرش ع النت ازاي اكون زوجه غلسه ونقضيها غلاسه بقي
وعموما كويس يا اسراء ان انا اكون اول سبب لابتسامتك ويارب دايما يا روئه

حرام عليكى يا مانجا ولوعايزةتصلحينا قولينا ازاي الواحدة تكون زوجةغلسةوعلى فكرةكل مواضيعك تجنن