هنموت هنعيش هنفوت للدراويش؟؟؟؟؟؟؟؟؟؟؟؟؟؟؟؟؟؟؟؟؟؟

انتهت مباراة القمة بين النادي الأهلي ونادي الزمالك نهاية تراجيدية حزينة بالنسبة لنادي القرن؛ والفائز الأكبر في هذه الموقعة هو النادي الإسماعيلي الذي ينافس بقوة للحصول على درع الدوري..

وبمجرد أن فقد الأهلي نقطتين غاليتين في هذا اللقاء بدأت الحوارات التالية بين مشجعي الأهلي:

أولا: قبل مباراة الزمالك والإسماعيلي

المشهد: ليل خارجي.. ثلاثة من مشجعي النادي الأهلي على القهوة، بجوار مجموعة من مشجعي الزمالك:

حموكشة الأهلاوي : إحنا كده ضيعنا الدوري..

أحمد الحمش: طبعا ضاع، بكرة الزمالك يسيب الماتش للإسماعيلي نكاية فينا.. ما هم متغاظين بقالهم كتير.

مسعود: عارفين الزمالك بيفكرني بإيه؟ بالراجل الرخم اللي بيعدموه هو وواحد معاه.. ولما سألوا اللي معاه نِفسك في إيه؟ قال: نفس أشوف أمي.. ولما سألوا الرخم نفسك في إيه؟ قال: نفسي الراجل ده ما يشوفش أمه!! يعني مش مهم ناخد الدوري بس الأهلي ما ياخدهوش..

الكلام ده لما يصدر من بعض مشجعي الأهلي يمكن يكون مبلوع؛ لأن التعصب بيخلي الناس ما تثقش في أي قيمة تانية.. لكن العجيب لما يصدر الكلام ده من بعض مشجعي الزمالك وتلاقي الواحد منهم بيرد على مشجعي الأهلي ويقول:

لا يا راجل دي مش أخلاق الزمالك.. بكره تشوفوا الزمالك هيلعب بجد..
لكنه يلتفت ويقول في نفسه: مش مهم نتغلب من الإسماعيلي.. بس الأهلي ما يشمش ريحة الدوري!!

ثانيا: بعد المباراة

المشهد: ليل خارجي.. نفس الثلاثة من مشجعي النادي الأهلي على القهوة بجوار نفس المجموعة من مشجعي الزمالك

والثلاثة قالوا في نفس واحد: شفتم أهوووو الزمالك باع الماتش.

معقووووووووووولة؟!!

http://www.boswtol.com/Upload/Pages/AMR_2549_42_49_13_30_4_2009_.jpg