[b]تعالوا نشترك فى الحملة ونعمل شئ ايجابى لحياتنا[/b]

انا ياجماعة مكتبى فى مدرج كاميليا وكنت كل ما ادخل المدرج علشان اروح مكتبى احزن جدا لشكل المدرج وحجم الزبالة اللى فيه على الرغم من ان العامل بينظف المدرج ومع وجود سلات فى المدرج ومع ذلك الطالبات مش بيحفظوا على المدرج بدليل وجود زجاجات الحاجة الساقعة وكبايات الشاى البلاستك والورق اللى فى المدرج.
ففكرت فى شئ هاقولكم عليه ايه رايكم نعمل حملة وهدف نقف كلنا وراه لنظافة الكلية ومش مطلوب منكم اكتر من انكم تلقوا المخلفات فى سلات القمامة حتى لو مكنتش موجودة فى كل الامكان ندور على مكان يكون فيه سلة المهم محدش يرمى اى شئ فى ارض الكلية او مدرجاتها . وأدارة الكلية دلوقتى زودت الكلية بعدد كبير من سلات القمامة ولسه في سلات تانى هاتيجى. احنا عايزن نعمل الحملة دى هدف لينا كلنا ونجرب ونشوف ايه شكل الكلية لما تنجح الحملة . فكرنا فى اسم للحملة واخترنا
اسم "كليتك واجهة لبيتك" تعالوا نعمل شئ ايجابى وهدف نمشى وراه ونسعى لنجاح الحملة وصدقونى هانشعر بسعادة كبيرة اوى لما نعمل شئ ايجابى ونشعر بمجهودنا ا
اد ايه حقق النتيجة المرجوة منه انا متحمس جدا للحملة وانتوا حماسكم اد ايه.
محمد عيد سكرتير قسم العلوم النفسية

والله هى اكيد فكرة جميلة
واتمنى انها تتنفذ وياريت مش كل بنت تقول يعنى جت علية انا وتبدا بنفسها
وعجبنى اوى عنوان الحملة
مرسى جدااااااااااا موضوع جميل واكيد كلنا متحمسين طبعااااااااااااا

الموضوع و الفكرة حلوين اووووووووى و و يا ريت البنات تعمل بالكلام دة لان لو حصل دة فعلا الكلية هتبقى نظيفة و شكلها العام حلو[b]

فعلا احنا لازم كلنا نشترك في الحمله دى بس لو الحمله دى يبقى معاها امكانيات زى توزيع ورق وبوسترات باسم الحمله وهدفها وكمان توفير سلاتالقمامه وكمان يبقى في اعضاء للحمله معروفين بحيث لو شافو حد بيرمى حاجه على الارض يوجهوه ويكون لهم شاره تبين انهم اعضاء في الحمله كده هتبقى ايجابيه اكتر ويسلام لو الدكاتره يدخلو في الحمله دى كمان وكل واحد قبل المحاضره يكلم عن الحمله دى وعن النظافه هتبقى فعاله اكتر واكتر

شكرا جدا على هذه الحملة وياريت يا جماعة كل واحدة تبدا بنفسها ومتهايألى لما البنات يشوفوا ان الارض نظيفة سيجبروا على القاء المخلفات فى القمامة و ياريت يا جماعة نساعد بعض على نظافة بيتنا الثانى

كل الكلام اللى حضرتك و البنات قالوه جميل جدا بس انا كنت عايزة اوضح ان اغلبية البنات بيرموا القمامة فى السلات لكن المشكلة ان كل السلات مليانة لان مفيش حد من العمال بيشلها و يفضى السلات علشان البنات ترمى فيها وكمان لما بنطلب من العامل ينضف المدرج يجى بعد مدة و ينضفوا اى كلام و كمان يرمى اللى فوق البينج على الارض و بعدين يزعألنا على ان احنا اللى رمناه واصحابى شافوه ويؤلنا هيسحب اال ايه كارنيهاتنا !!!!! واحد زى ده يتعمل معاه ايه؟؟؟ بس انا بجد متشكرة ليكم كلكم لانكم فكرتوا فحل ويا رب يبدا التنفيذ .....

فعلا كلامك صح جدا يا مها وانا شاهدة على كدة

الفكرة جميلة وانا هشترك فيها لو شفت حاجة رمياها البنات فى الارض هرميها فى سلة المهملات لان انا والحمد لله مش برمى حاجة فى الارض خااااااالص لان انا متعودة على كده وكمان كدة اصلا مش لائق ان يتقال علينا ان المسلمين مش نظيفين وان اصلا الاسلام بيدعو الى ضرورة تحرى النظافة فى كل مكان مش شرط بيتك لان الكلية دى دار علم وواجب علينا ان احنا نحافظ عليها

اشكركم كلكم على ردودكم الجميلة واسمحولى اشكر" شوشو 16 " على تعلقها والخطوة الايجابية لما قالت "وانا هشترك فيها لو شفت حاجة رمياها البنات فى الارض هرميها فى سلة المهملات" لان بالفعل ده الهدف من الحملة اننا نشترك بإيجابية مش بس نبدى أعجبنا بالحملة، واسمحولى اقولكم ان هذه الحملة فى طرقها للفشل وانا اسف انى بقول كده لان الوضع فى المدرجات بصفة خاصة لم يتغير ومحدش اخد خطوة ايجابية او امتنع عن القاء المخلفات فى المدرجات
ارجوكم انقذوا هذه االحملة باضافة مقتراحتكم وارائكم لانقاذها حتى لا اعلن فشل حملة " كليتك واجهة لبيتك"
اذا اى حد عنده اقتراح ممكن يقوله هنا او يتوجه لوحدة الجودة بااكلية وانا هاكون موجود او اى حد من اعضاء الوحدة ونحاول مع بعض ننفذ تلك الاقتراحات
شكرا
محمد عيد- عضو وحدة ضمان الجودة

ليه بس الفشل ان شاء الله الحملة هتنجح وهتبقى الكلية بتاعتنا انظف كليه على وجه الكوكب الارضى
وانا عندى اقتراح ان احنا نعمل بوسترات ونعلقها فى المدرجات ونحث البنات ان هما يشتركوا معانا