تعليمات للامتحانات

متهيلي الشروط الي في الاول اتلغت وإتغيرت جذريا في الجامعة كلها

ويمكرون ويمكر الله والله خير الماكرين وادعلنا بالتوفيق

السلام عليكم ورحمة الله وبركاته
بيوتى هل تأكدتى أن هذه التعليمات التى ذكرتيها تجعل البنات تُقهر فى الكلية أو يضيع وقتهم
تفتيش إيه يا بيوتى ، الكلام اللى بتقوليه ليس له أى أساس من الصحة ويمكنك التأكد من الطالبات فى جميع الفرق
ولكن هذا لا يصح أن يكون هذا رأيك فى الكلية
وأنا فعلاً زعلانه منك عارفة كام إنسان يدخل على هذا المنتدى لماذا تتشوه صورة الكلية والجامعة بهذا الشكل
وهو غير صحيح ( حد قالك إننا كفرة )
ربنا الأعلم بكم الرأفة الرحمة والقلق عليكم أيام الامتحانات لا يمكن أن يقابل بهذا الكلام المسئ
ويعنى إيه الحمد لله إنك اتخرجتى ............. على العموم شكراً
ولكنى أزيد تأكيدى أن التفتيش وما وراء الكلام عن المنقبات ليس له أى أساس من الصحة وعلى فكرة ربنا معاهم ومع الجميع مش هما بس
قال تعالى : { يأيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين }
السلام عليكم ورحمة الله وبركاته

و عليكم السلام ورحمه الله وبركاته

انا خصيت بكلامى عن المنتقبات يا دكتوره هند .. لان لو كنت انا مكانهم و اتقالى اقلعى النقاب طول فتره الامتحان هيبقى صعب عليا جداا و اعتقد ان ده كان باين عليهم جداااا لما كان بيحصل ادامى السنه اللى فاتت
مع انه مكنش فيه ورقه تعليمات ملزوقه اما السنه ديه انا اول لما دخلت مدرج من المدرجات لاقيت الورقه ديه
يعنى الموضوع هيطبق عليهم بشكل اكتر من السنه اللى فاتت .. ف طبيعى منى انى ادعيلهم ان ربنا معاهم
و يسخر لهم الخير كمان

و بالنسبه للتفتيش اللى فى اول ربع ساعه من الامتحان .. ده كان بيحصل معانا احنا ككل البنات
المراقبين بيعدوا على واحده واحده يفتشوا عن سماعات و موبيل وكدا .. ممكن اقول بيدورا على سماعات بدل كلمه بيفتشوا .. بس من وجهه نظرى بدل لما المراقبات لمسوا اذاننا يبقى تفتيش

و على فكره شئ طبيعى ان يبقى فى تعليمات للامتحانات لان لازم الاجابه تكون بمجهود الطالبة فقط
لكن انا تعليقى كله على اول نقطتين فى الورقه ديه

و اذا كان كلامى ملوش اساس من الصحه يبقى الورقه ديه اتعلقت ليه ؟
و ليه مكتوب فيها كشف الوجه للمنتقبات و عدم استخدامهم الكمامات
بس انا حقيقى بعاتبك لانك المفروض انك عارفانى و عارفه ان ميطلعش منى كلام مش متأكدة منه

و بالنسبه لكلامى على انى بحمد ربنا انى اتخرجت ف انا فعلا مبسوطه انى اتخرجت و صدقينى ملهاش اى معنى غير انى زى اى طالبه مبسوطه بتخرجها لانى مكنتش هبقى مبسوطة لو حصل العكس فى نتائج الامتحانات ولا ايه ؟!


ف انا لا اقصد ان اسيئ للكليه اللى طلعتنى مدرسة شاطرة و فاهمه انا بعمل ايه فى القاعه بتاعتى
و زى ما حضرتك قولتى ان فى رحمه لينا كطالبات و حضرتك من اول الدكاتره اللى ساعدتنا فى الكلية كتير

و متزعليش منى يا دكتوره هند حضرتك غاليه عندى جداااا و اعتقد انك عارفه غلاوتك عندى اد ايه !
بس اللى حساه دلوقتى ان فى سوء تفاهم حصل فى فهم الموضوع اللى نزلته ..

السلام عليكم ورحمة الله وبركاته
بيوتى نسيت اسمك يا مصيبة من كتر ما كنت زعلانة منك
فعلا أنا كنت زعلانة بجد فدائماً أخشى ممن لا يعرفنا
مش عارفه أنا صح ولا غلط بس أنا فعلاً كل شوية بأتأكد إن أنا بأحب الكلية ده أوى وأكيد ده منعكس عليّه فى حبى لبناتها
وفعلاً ده كان سبب إنفعالى أمس
لكن طبعاً عشان حضرتك يا ست بيوتى من الناس المقربين لى فتعلمى جيداً إن قلبى أبيض وبأنسى بسرعة وضحكتِ عليّه بكلمتين
بس مش مشكلة المهم إن أى حد يدخل على المنتدى يفهم كويس إن إحنا مش وحشين أوى كده ولا إيه يا حاجة بيوتى؟
بس جادعة تعالى الكلية تانى وشوفِ هأعمل فيكِ إيه طبعاً إنتِ عارفة هأعمل إيه؟؟؟؟
السلام عليكم ورحمة الله وبركاته

بعد إذنك يا دكتور
فعلاً الكلية فيها ناس كويسة جدااااا
و منهم ناس كتييييير جداً الغالبية متفقة عليهم إنهم من أروع الشخصيات اللي قابلناها في حياتنا حتى بعد ما اتخرجنا
بس ده لا يمنع إن الكلية زي ما ليها وجه رائع ليها وجه تاني وحش كل حاجةزي العملة فيها الحلو و فيها الوحش
يعني فعلاً المنتقبات بيبقوا تحت ضغط نفسي جامد
دول ناس مقتنعة باللي هي لابساه و لما حد يجبرها إنها تقلعه بتحس إن جزء منها إتقطع
- و على فكرة أنا مش منتقبة بس أعرف ناس منتقبة كتير -
و بعدين ما السنة اللي فاتت كان متنبه بكده برضه و غالباً مكنش بيطبق لما البنت تصر على موقفها
و كان المراقبين بيسيبوها - و أنا موافقة جدا - بس بيستفزونا احنا كطالبات و يقلبوا اللجنة صالون ثقافي صح اللي هي عملته و للا لأ و إيه المفروض و اللي مش مفروض بجد ببقى قاعدين أنا شخصياً بيبقى هاولع من الغيظ و دول مهما حد يقولهم بعد إذنكو الصوت أو نركز يقولولها خليكي في ورقتك )!!!!!!!!!!!(
يعني حد كان قال إننا في 3 ابتدائي عشان تتقالنا الكلمة دي لما نتطلب منهم يوطوا صوتهم ؟؟
و صوتهم فعلاً بيبقى عالي

و كمان التفتيش فعلاً موجود و كان بيحصل و بدأ بالذات من دفعتنا بيمشوا على واحدة واحدة المراقبات يحسسوا على وداننا عشان سماعات البلوتوث
و مرة واحد عندنا من المراقبين في اللجنة شغل البلوتوث في موبايله و لقى حد فاتح
فضلوا قالبين اللجنة عندنا أكترمن الربع ساعة دي عشان مين اللي فاتحة
و في الآخر طلعت مش واحدة عندنا أصلاً
طب كان لازمتها يه من الأول الشوشرة ؟؟!!!؟؟؟

معلش يا دكتور اللي بيحصل في اللجان فعلاً كتير آه اتخرجنا
آه اتخرجنا بس ياما اتحرق دمنا و نطلب من المراقبين بأدب و مفيش برضه
لكن برضه لا يمنع إن في مراقبين كانو قمة في الذوق و بيراعونا جدااااااااااا
و كانو ناس بنفرح لما نلاقيهم هيراقبوا علينا و فاكراهم لحد دلوقتي و كانو بيراقبوا عليا آخر امتحان ليا في رابعة و مكنتش عايزة أسيبهم و أخرج
و المنتدى المفروض يكون ساحة تواصل بين الطالبات و الدكاترة يعني المفروض الطالبات و البنات تتكلم بحيث إن اللي بيحصل في اللجان يوصل للدكاترة و يشوفوا هل ده يصح و للا لأ و لو لأ يتعالج مش يفضل الحال كما هو عليه سنة ورا سنة

و فعلاً أنا كمان بقول الحمد لله إني اتخرجت
مشتاقة للكلية و ناسها و تعب و ضغط الشغل فيها
بس أكيد هاحمد ربنا إني أخيراً بعد مشوار 17 سنة خلصته و اتخرجت و خدت الشهادة

و عليكم السلام ورحمه الله وبركاته

متقلقيش يا دكتور انا عارفه الكليه كويس .. مش غريبه عنها يعنى
و مكنش فى زعل ولا حاجه هوا زى ما قولت ده سوء تفاهم ..
و زى ما دوريمى قالت بردوا ان الكليه فيها الحلو و الوحش بس احنا فعلا زى ما حضرتك قولتى مش وحشين اووى

و بصراحه موضوع النقاب يضايق ياريت نقدر نعمل فيه حاجه لان دول بنى ادميين و صعب موقفهم ده ؟!
كان فى السنين اللى فاتت المرقبات يتاكدوا من الكارنيه ان المنتقبات هما اللى بيمتحنوا و بيبقى خلاص كل واحده فى حالها و بتحل مع نفسها
ايه اللى جد معرفش بصراحه ؟! و كمان فى الديمقراطيه فى الموضوع ده و فين حريه البنت فى لبسها النقاب او عدم لبسها النقاب ؟!
بصراحه ده رايي الشخصى ...

بس هوا انا لو جيت الكليه هتعملى فيا ايه .. هتعض ؟!
و بصراحه كان باين انفعال حضرتك عليا لدرجه انى تحولت لـ فاسق فجاة ؟!