كان ياماكان

كان ياماكان .. كان فى ملك عنده مملكة عظيمة أعظم من كل الملوك وكان عنده بنت آية فى الحسن والجمال وكان عنده جنود كتير جدا وفى


شوية منهم مسخرين نفسهم ليه تماما .. بينفذوا أوامره بالحرف الواحد منغير نفاش لأنهم بيحبوه جدا وعارفين كويس معنى الإخلاص .. جمع


الملك شباب المملكة كلهم الأغنيا والفقرا علشان يختار الأمير اللى هيجوزه الأميرة الجميلة ويملك المملكة العظيمة دى ..


كل الشباب طبعا كانوا بيحلموا بالفرصة دى وكل واحد بيقول لنفسه انا مستعد لأى حاجة يطلبها منى الملك فى سبيل إنه يختارنى ..


الملك مابصش لواحد فيهم لأنه مش من الحكمة إنه يختار بالشكل ولا سأل على حد فيهم لأنه مش من الحكمة إنه يختار حسب كلام الناس


ولا حتى كان يهمه الأمير المنتظر دا غنى ولا فقير ..


وجت اللحظة اللى الملك هيتكلم فيها ..


الملك قال ..


الأمير المنتظر لازم يكون مطيع وينفذ كل اللى أطلبه ويكون مخلص ليا .. يكون شجاع وصبور ومستعد إنه يضحى بنفسه عشان المملكة


اللى شايف فى نفسه الصفات دى .. الطاعة والصبر والإخلاص والشجاعة .. يعرف انه هو اللى هيكون الأمير المنتظر .. علشان كدة قررت

أعمل اختبار صغير جدا ..


هابعتكوا كلكوا .. ليوم واحد بس .. لجزيرة فى وسط البحر


وهطلب منكوا مهام هتأدوها هناك وهحذركوا من حاجات المفروض تبعدوا عنها دا هيكون اختبار الطاعة ..


واتفق مع الجنود المخلصين بتوعه انهم هيتابعوهم ويراقبوهم وأحسن واحد هيلتزم .. هيكون هو الأمير .. وهيهديه الأميرة الجميلة اللى لما


هايشوفها هيدرك إنه ماشافش جمال قبل كدة خالص ..


كل شاب قال لنفسه دا اختبار سهل أوى خلاااص انا ضمنت انا الأمير ..


نفذ الملك الخطة وبعتهم للجزيرة يوم واحد بس ..


رجع الجنود المخلصين دول وهما فى غاية الأسى والأسف والحزن .. كانوا مستغربين جدا وهما بيقولوا للملك .. مفيش ولا واحد نقذ

أوامرك .


بالعكس كل واحد اتصرف ذى ماهو عاوز .. دول أغبيا جدا .. هو فى غباء كدة ..


الملك ماستغربش خالص ...


انت عارف .. انت كمان المفروض ماتستغربس .. أيوا انت .. لأنك كنت من ضمن الشباب اللى راحوا الجزيرة صح ؟؟


ندخل بأة فى الواقع اللى هو أغرب من القصص والخيالات ..


ربنا جابنا هنا عشان بختبرنا فى الطاعة والإخلاص ..


وأمرنا بحاجات ونهانا عن حاجات لفترة قصيرة جدا ووعدنا بعد كدة لو نجحنا بملك عظيم وحور عين وجنة تجرى من تحتها الأنهار فيها


مالا عين رأت ولا أذن سمعت ولا خطر على قلب بشر .. صح ؟؟


والمفروض إن كل حاجة بتعملها ربنا بيسجلها هتمر أدامك يوم القيامة وتتسجل فى كتاب هتقراه يوم القيامة .. وكمان كل حاجة بتشهد عليك


لدرجة انك نفسك هتشهد على نفسك ..


.. انا عارفة ان انتوا عارفين الكلام دا كوبس وأكتر منى كمان لكن المشكلة اننا بننسى .. ونرجع ننشغل تانى عشان كدة ..


قلت أفكر نفسى وافكركم .. لعلنا نتجمع بصحبتنا دى فى الجنة إن شاء الله ..

بجد القصة جميلة جداااااااااااااااااااااااااااا

تسلم ايديكى

وبجد فعلالالالالالالالالالالالالالا عندك حق

الله ....بجد قصة جميلة جدا يا فرح ....فعلا عندك حق ...جزاكي الله خيرا

اداية خايفة من لقاء ربنا

بعصية فحاجات مقدرش اغيرها

وهى لبسى انابلبس جيبة وبادى وتحجيبة بس الاكمام ساعات بتكون ضيقة
ادعولى البس الاسدال وارتاح من خوفى من ربناالشديد

جزاكى الله خيرا