وائل غنيم فى حلقة ال 10 مساء مع منى الشاذلى

واللة العظيم ما عرفة ارد اقول اية غير انى الحمد للة لست من هؤلاء المغفلين ولم يتغير رأيى منذ البداية سواء قبل الخطاب العاطفى او بعدة لكنى فقط اصبحت اكثر حرية فى التعبير عن رأيى ويرجع الفضل فى ذلك الى ثورة 25 يناير
كل الى بيحصل دة من خراب ودمار و شهداء و معتقلين لتمسك الرئيس بكرسى السلطة خلاص احنا موافقين ياخد الكرسى معاة وهو ماشى دة برضو عشرة 30 سنة ومفيش حد استحملة مثلة .

اذا كان كلامه حقيقة فعلا؟!
يبقى وجب عليا الاعتذار لسوء ظنى فى ادمن صفحة كلنا خالد سعيد
بس التضليل فعلا كان قوي و الاثباتات اللى اظهروها قوية جدا وبتخاطب العقل
لو فعلا زى ما حسيت صدق كلامك يا وائل
انا اسفة لظنى فيك
وبالنسبة لكلامه وتحليلاته فعلا احنا حاسينها من زمان ومحدش كان بيتكلم
و كله كان خايف
وانا عمرى ما انكرت مجهود الشباب ده والجميل اللى عمله لينا بشجاعتهم وجرأتهم
بس بجد ياااااااااااا ريت نشوف حلول لانعدام الثقة وعدم التصديق
مش عارفة حاسة اننا بقينا زى المحاكم اطلعنا على ما يثبت ذلك ؟!
بجد مش عارفة اقول ايه ؟!
الله يرحم الجميع شهداء واحياء

لا تعليق غير ان ربنا يحمي ولاد مصر الجدعين اللي خايفين عليها

اللهم ارنا الحق حق وارزقنا اتباعه وارنا الباطل باطل وارزقنا اجتنابه

الفتره اللى فاتت كانت اراء كتير بتتقال .. بصراحه طول السنين اللى فاتت ديه كنت فاكره اننا الشعب المحظوظ برئيسه الطيب النبيل حتى فى كلامه تحسوا انه طيب
اللى اعرفه ان علشان نحكم على الناس نشوفهم بيتكلموا ازاى .. كان فى مقوله بتقول تكلم حتى اعرفك
لكن الريس كان بيطلع على الهوا خمس دقايق يقول كلمتين حلوين و يقفل بسرعه

اما دلوقتى بقى انا محايده مش عايزه اقول انى مؤيده ولا حتى انى معارضه
لانى بين البينين .. بس اللى ممكن اقوله انه ممكن يعمل انتخابات الرئاسه دلوقتى و ينقل السلطه سلميا بردوا

ـــــــــــــ

اتكلم بقى عن خالد سعيد .. الشاب ده مات على ايد مخبرين من الحكومه ضربوه لحد لما شوهوه و بقى شكله يرعب
لحد لما مات .. و كل ده علشان كان معاه فيديو بيدين بعض الظباط فى الشرطه
الشاب ده لو شوفتو شكلو قبل ما يموت و بعد لما مات معرفش هيبقى رد فعلكم ايه ؟؟؟
غير ان الحكومه بتاعتنا ما شاء الله عليها لا يُعلى عليها يعنى
و اللى عرفته ان تم تزيف الحقيقه و اتقال انهم مسكوه علشان مخدرات و حوارات ملهاش لازمه
و قالوا انه مات علشان خد مخدرات كتير لكن اكيد الحقيقه ظهرت فى الاخر
وطبعا محدش اتكلم قبل كدا لان اهل اسكندريه المحيطين ببيت خالد سعيد كان بيعدى عليها عربيات و بيتقالهم اللى هيتكلم فيكو هيجرالو نفس اللى حصل لخالد سعيد و طبعا اللى حصل لخالد حصل فى الشارع ادام الناس
الكلام ده كله للاسف كان جديد عليا الفتره ديه لانى ما اهتمت انى اعرف التفاصيل قبل كدا
كل اللى كنت اعرفه ان فى شاب قتلوه المخبرين لكن ليه معرفش .. و كان تحليلى انه عادى الشرطه لان كلنا عارفين جبروت الشرطه من زمان

https://www.youtube.com/watch?v=P7MvmzQ1ZM4

ـــــــــــــــ

اما بالنسبه لوائل غنيم
طلعت عليه افلام كتير علشان يخلونا نصدق انه كداب و انه عميل و انه حاجات كتير
و فى الاخر طلع مصرى بيحب بلده عايش بره علشان مخدش حقه هنا زيه زى احمد زويل
متجوز من امريكيه مسلمه و ده شئ ما يأثرش على حبه لمصر زى ما كتير ناس استغلت النقطه ديه
هوا اللى كتب على الكيبورد ان المصريين تفوق بقى من الغيبوبه اللى كانوا فيها مع انه بعيد عن مصر
لانه عايش فى الامارات لكن كان بيتابع احداث مصر بلده لانها تهمه ..
اتكلم بقلبه قبل ما يفكر بعقله و كل اللى قاله احنا شايفينه
بس خساره مجتش مننا احنا اللى عايشين فيها و شاربين منها ..
بس مش ديه القضيه المهم اننا اتحركنا و مش مشكله مين اللى حركنا و كلنا مصريين
و بصراحه انا بثق فى منى الشاذلى و وائل جيه فى البرنامج بتاعها
و قال الكلام اللى كلنا سمعناه و صدقناه لانه كان بيتكلم بطلاقه شديده .. انا مكنتش مستوعبه اللى سمعته

كان فى ناس كتير بتقول ان مبارك يسيب الحكم اكنه مات فجأه ولا هيحصل فوضى ولا حاجه
بس مبارك لو مات كان ابنه مسكها على طول بالانتخاب 100 % و انتخابات نزيهه قال ايه يعنى
لكن الوضع دلوقتى متغير احنا مش عايزين لا مبارك ولا ابنه و الناس يا عينى مرتبوش حسبتهم على كدا
ف غالبا و تريقه على الموضوع هما عايزين مهله يفكروا يدوها لمين فى الكام شهر اللى جايين
سيبوه الراجل يشوف شغله .. تصدقوا اننا طلعنا وحشين اووى كدا بنعطلهم عن ممارسه اعمالهم السياسيه
و كمان لو حتى هيدوها لحد نضيف هيحكمها صح .. هما بردوا محتاجين ينضفوا اوراقهم من البلاوى اللى فيها
والا هتبقى فضايح مبارك و الكل اللى تحتيه بجلاجل .. و وقتها هتلاقو الريس الجديد تم اغتياله و ده المتوقع

ـــــــــــــــــــــــــــــــ

اما بالنسبه لأنكل عمر سليمان .. لحد دلوقتى بيقول فى محادثاته مع امريكا ان اللى بيحصل فى مصر من الاخوان المسلمين .. تقريبا مش واخد بالو لسه ان دول الشباب و لا تلاقيه بيتفرج على الاعلام المصرى و غالبا ميعرفش ان كلنا مصريين اخوان او مسلمين او مسيحين
و بيقول كمان ان مصر مش مستعده للديمقراطيه .. ده على اساس اننا مكناش عايشين فيها من زمان حسب كلامهم زمان بردوا على التليفزيون .. لا تعليق يعنى
و لسه يا ما هنسمع من كلام و اليوم اللى بعده نسمع ضده

https://www.youtube.com/watch?v=HxXnMDngyCE

ــــــــــــــــــــــــــ

و اخيرا انا كــ مصرية رايى زى كل مصرى عايزين ناخد حق الشهداء اللى ماتوا فى الثوره ديه
و اللى قتل خالد سعيد يتحاكم و وزير الداخليه يتحاكم و أنكل احمد عز و كل بنى ادم غلط فى مصر و المصريين يتحاكم
و يتعدم لانه خان مصر و خيانه البلد ملهاش عقوبه غير الاعدام او النفى
بس هما يرجعوا حق البلد المنهوب و المليارات اللى وخدنها من الشعب
و الاراضى اللى اخدوها مننا غصبا و اقتدارا
و مصر هترجع غصب عنهم بلد الامن و الامان لان ربنا هوا اللى هيحميها مش اى حد تانى

ـــــــــــ

واعتقد و الله اعلم ان مفيش حد يجرأ انه يجى مصر و يحتلها فى الظروف ديه بالذات
و خصوصا اسرائيل اللى مظهرتش على الشاشه الايام ديه غير انها عايزه تحافظ على معاهدات السلام بينا و بينهم
اما اوباما حمامه السلام اللى اول لما ركب حصان امريكا اعد يلف على دوله دوله و جيه مصر و راح الاهرامات متعرفوش رايح يعاين البضاعه ده ولا ايه .. بس معتقدش بردوا انه يجى لانه هيتاكل
لان ببساطه احنا المصريين و اذا كان فى التحرير 3 مليون بس ف لما حد يجى بلدنا هيبقوا 80 مليون فى الشارع و يبقى حد يقرب لمصر بقى

ــــــــــــــــــ

https://www.youtube.com/watch?v=U1EhVMGEAeA&feature=player_embedded

ـــــــــــــ

كفايه كدا علشان اتكلمت كتير و حاسه بردوا انى مقولتش كل حاجه ... مش كان المفروض متكلمش احسن

بس فى الاخر ادعو معايا تانى و تالت ورابع و خامس علشان محدش يضلنا و لا نكون مغفلين

اللهم ارنا الحق حق وارزقنا اتباعه وارنا الباطل باطل وارزقنا اجتنابه

بأختصار
كلام رائع

أنا من البداية للنهاية مع الثورة
لأن كلنا شايفين الظلم والفساد حوالينا
بس خلاص الناس مبقتش تخاف
وبجد وائل غنيم هو كمان بطل
أشكرك على التوبيك يابيوتى

شكرا ليكى يا توتا و مستنياكى بعد لما تخلصى من حاله الصمت

و بالنسبه لكلامك يا اطياف

مفيش حد كان ضد الثوره .. كلنا كنا معاها لاننا شايفين فى فساد فى البلد
لكن الاختلاف على نسيب مبارك 6 شهور ولا لأ
و على رايك مبقاش حد بيخاف دلوقتى ..
و شكرا ليكى .. انا بعبر عن رايى بس معملتش حاجه

ــــــــــــــــــــ

اعتقد ان كلنا مستنين مبارك هيقول ايه فى خطابه اللى جاى
قولو يا رب خييييييييييير لينا كلنا

فاصل و نواصل

أكيد يابويتى
خاصة إنه معظم المصريييييييين اتعملو مع الخطاب إللى فات بعواطفهم
وده لأننا بطبيعتنا شعب عاطفى
وناس سابت الميدان وناس بدأت تقول خلاص
وناس بالعكس بدأت تزيد
وإن شاء الله كله يكون فى صالح مصر وخير لينا كلنا

اعتقد اننا نستنى لبكره بالليل علشان نعرف اللى فى ميدان التحرير هيعملوا ايه بكره

و ربنا يستر