لحد امتى نخااااااف

السلام عليكم

ازيكم يا بنات
فى البداية أحب أبارك لكل بنات الدفعة اللى نجحوا وبقولهم ألف مبروك

انهارده انا هتكلم ومش هخاف من حد
لأنه خلاص معدش يفرق معايا

طبعا كلكم عارفين جمال مختار - وطبعا مش هقول دكتور لانه ميستحقش يكون دكتور -
دكتور بأى حق وبأى دليل

دكتور عشان بيجى أول الترم يقولنا الى هيجيب الكتاب الأول هياخد درجات أعلى من اللى هيتأخر
طب ما ف النهاية كلنا هنجيب الكتب ، فرقت ايه اول من تانى
لكن لأ طبعا
لازم يلم فلوسنا من أول أسبوع

ولا دكتور عشان بينزلنا كتاب ميتقريش ويقولنا كل الدفعة هتاخد جيد جدا وامتياز وفى الآخر يسقط نص الدفعة بدون أى وجه حق

عشان كده طبيعى جدا نلاقى الدفعات التانية اول ما تعرف ان الشخص ده بيدينا تقولنا الله يكون ف عونكو

ليه يا دكتور وبأى حق تسقط البنات فى المادة
بأى وجه حق تضيع مستقبلهم ف آخر سنة وتخلى يتكتبلهم دور تانى
ولا تضيع عليهم سنة من عمرهم
كتاب وجيبناه من اول السنة
شيت وسلمناه ف معاده
محاضرات وعمرنا ما فوتناها
مذاكرة وذاكرنا المادة
يبقى ليه نسقط
فى شرع مين ده يا دكتور

مين اللى شرع الظلم بالمنظر ده
ولا عشان احنا رقبتنا فى ايدك زى ما البنات كانو بيقولو

من السنة اللى فاتت وانا بقول للبنات لازم منسكتش ع الظلم ولازم ناخد حقنا من الراجل ده
لازم حد يوقفه عند حده
مش عشانى لأنى خلاص معدتش فارقة معايا
لكن عشان الأجيال الجاية متتظلمش زينا
لكن كنت الاقى البنات تخاف وتقول لازم نطاطى عشان ممكن يسقطنا
وفعلا طاطينا وعملنا كل حاجه
وبرده فى الآخر سقطنا
عشان هو عنده مرض انه يحرق دم البنات ويضيع مستقبلهم
عشان عنده عقده ومريض نفسى

طب زمان وكان فى ظلم واستبداد
وكانت الناس بتخاف تدافع عن حقوقها
لكن خلاص
احنا انهارده أصبحنا فى زمن الحرية
زمن عودة الحقوق المسلوبة
زمن لازم نطالب فيه بحقنا من الراجل ده
لازم نثوووور
لازم نثوووور ونطالب بحقوقنا
لازم الراجل ده يتعاقب وياخد جزاءه

فى شرع مين واحدة تبقى بتحضر محاضرات طول الترم وجايبة الكتاب ومسلمة الشيت ومذاكره المادة وفى الآخر تجيب 6 من 50 !!!!!!!!!!!!!!!
يرضى مين يا دكتور
يرضى مين انك تخلى بنت كان كل املها انها تنجح وتجيب تقدير عشان تشتغلش وتصرف على نفسها وتخفف عن أهلها تسقط
او بنت تانية كان حلم أهلها انها تنجح وانت تخليها ترجع لأهلها بمادة ، وربنا واحده اللى يعلم انها مقصرتش فيها

ظلمك ده يرضى مين يا دكتور
ظلمه ده يرضيكم يا بنات
يرضيكم ان حد يستغل صلاحياته ف انه يسقط اللى على مزاجه وينجح الى على مزاجه

و بنات تانيين كلكم عارفين انهم ممتازين وبيحضرو المحاضرة ف معادها وبيذاكروا من أول يوم
يبقى يشيلو المادة ليه
حراااااام
اقسم بالله العظيم حرااام

حرام مادة تافهة زى دى لو اديتها لعيل ف الشارع يذاكرها هينجح فيها
عيب مادة عبيطة زى دى يشيلها لنص الدفعة
حسبنا الله ونعم الوكيل

لحد أمتى نخاف يا بنات
لحد امتى هنسكت على حقوقنا
لحد امتى هنشوف الظلم باين قدام عنينا ونسكت

خلاص الفرصة جت لحد عندنا
وربنا رزقنا بثورة حررتنا من الظلم والفساد

يبقى ليه منقومش نطالب بحقوقنا
ليه منقومش نطالب بمحاكمة الراجل ده
ليه منطالبش بفرز اوراق امتحانات البنات الى سقطو فى المادة دى ونشوف هل فعلا هم سقطو عشان محلوش
ولا عشان الدكتور مكانش فى المود وحب يسقط كام واحده مع كوباية الشاى الصبح وهو بيفطر

قومو يا بنات دافعو عن حقوقكم
اى بنت اتظلمت ترفع وتها وتطالب بحقها
" لا يضيع حق وراءه مطالب "

وانا والله مش بعمل كده عشان انا شلت المادة
لا والله ابدا
انا اصلا مبقاش يفرق معايا خلاص
انا بس عاملة على الدفعات الجاية
حرام نظلمهم بالراجل ده
حرام والله
لازم رؤوس الفساد دى كلها تتقطع من جذورها
وحسبى الله ونعم الوكيل فيك يا جمال يا مختار
وأحب اقولك اننا والله ما هنسكت ع الظلم
وهنطالب بحقوقنا
من بكره هتسيب كرسيك
من بكرة
خلاص زمن الخوف ولى وانتهى
واحب اقولك فى النهاية

مش ساكتين مش ساكتين
على سلب حقوقنا مش ساكتين

وبكرة كلنا هنعتصم قدام مكتبك
ويا إما تورينا بالدليل ان البنات الى سقطت دى سقطت عشان محلتش
يا اما تمشى بكرامتك احسن

لاننا مش هنسكت
وبكررها تانى
والله العظيم ما هنسكت

ياريت تثبتوا على موقفكم ده

و يا البنات يا الدكاتره اللى بتظلمنا ديه فى الكليه ؟؟؟؟؟؟؟؟؟

و الاجابه فى ايد البنات نفسها لان رد فعلكم الاخير فى يوم الاحد اللى فات معجبنيش نهائى